去露營或者進行水上活動嘅人士要注意喇,由於南丫島深灣沙灘係綠海龜嘅產卵地之一,所以漁農自然護理署喺6月至10月期間實施「封灘」,禁止市民出入,任何人闖入最高會被罰款港幣5萬元。為咗唔好打擾綠海龜產卵,以及避免誤墮法網,大家就要記住喇!

南丫島深灣係香港唯一經常有綠海龜產卵嘅地方,所以深灣又被稱為「海龜灣」。根據《世界自然保護聯盟》,綠海龜屬於瀕危物種類別,科學家估計1000隻小海龜裡面,只有1隻能夠活至成年。現時所有海龜品種,都受《野生動物保護條例(第170章)》,以及《動植物(瀕危物種保護)條例(第187章)》等法例保護。

海龜嘅天性就係長大後會返去自己出世嘅地方產卵,每年嘅6月至10月,喺深灣出世嘅綠海龜都會返嚟產卵,但如果沙灘上有人,或會嚇走海綠海龜唔敢上岸產卵。於是漁護署就根據《野生動物保護條例》,將深灣劃為限制地區,限制市民進入。

原圖:漁農自然護理署、RTHK