隨住越來越多人關注環保,選擇「走塑」生活,各國開始研發一啲可以代替塑膠、可被生物分解嘅材料。越南早前出產一種全天然純植物飲筒,可重複使用,環保之餘仲係低成本之選!

雖然市面上已經有不鏽鋼、玻璃、紙飲筒等比較環保嘅替代飲筒,但一定無越南呢款新飲筒咁天然,因為佢完全無添加,直接用植物製造!湄公河三角洲一帶盛產蒲草(Lepironia Articulata),由於蒲草莖部中空,生長速度快,只需要將莖部剪成特定長度,就係一支飲筒,非常天然。

呢種飲筒仲分為新鮮版同乾身版,新鮮版即係啱啱剪落嘅蒲草,可以喺室溫下保存一個禮拜。而乾身版就加咗啲鹽煮過、晾乾,室溫下可以擺到6個月,售價大概2至4毫子一支。兩款洗乾淨後都可以重複用幾次,嚼爛佢仲可以清潔牙齒、牙齦添~不過可惜,香港仲未有得買。

圖:www.cuahang3t.org