唔少國家嘅學校都因為新冠肺炎疫情需要停課,荷蘭有一位小學老師Ingeborg,喺停課期間因為太掛住啲學生,於是佢就喺屋企親手用毛線為全班23個學生,每人織一個公仔。織完之後佢放上社交媒體分享,學生同家長見到之後都好開心,啲家長仲讚佢係一位好老師添。

Ingeborg係喺荷蘭北部城市哈倫(Haarlem)一間名為Dr. H.Bavinck School嘅小學任教,荷蘭由今年3月中開始停課,由於唔使上堂嘅關係,佢就掛住自己啲學生就開始喺屋企織學生公仔。每個公仔大約10厘米高,亦按照唔同學生嘅造型織成,有唔同嘅髮色、髮型,衣著亦都全部唔同,部分女學生頭上仲戴有頭飾添。每個公仔Ingeborg都用咗3-4個鐘去織,整晒全班23個公仔起碼都用咗接近70個鐘,真係少啲耐性、少啲體力都唔得!

早前荷蘭學校已經復課,學生由Ingeborg手中收到呢啲公仔,亦表現得好開心,紛紛多謝Ingeborg老師。

原圖:FB@Indian Wells Arts Festival