港鐵今日(2日)宣布,將引入5款智能機械人,提供路線查詢、引路、巡查、清潔等服務,呢5款智能機械人將會喺啟德站率先試用,預料會喺今年第三季開始投入服務。另外,港鐵亦喺八鄉車廠,試用「車底智能檢測機械人」。

5款站內機械人包括「尋路員-T」、「引路員-T」、「巡查員-T」、同兩款「清潔員-T」。「尋路員-T」同「引路員-T」主要負責客戶服務工作,解答乘客車程同車站位置查詢,除咗啟德站外,日出康城一座新落成嘅商場亦都會設有一部「尋路員-T」。「巡查員-T」同兩款「清潔員-T」就負責後勤工作,「巡查員-T」會喺車站關閉之後巡視車站,檢查設施狀況,而兩款「清潔員-T」嘅功能相同,但就有唔同尺寸,清潔時可以比一般清潔機械人慳一半水,更加環保。

車務總監李家潤表示,幾款智能機械人嘅研發成本大約400萬港元,其中負責維修嘅車底智能檢測機械人,能夠喺90分鐘內檢查8個車卡嘅底部,可以拍攝多達1800張相。港鐵副車務工程總管黃浩樑就話,呢啲高解像度相片有助掌握車底部件情況,機械人拍攝期間發現異常,就會報告俾職員。佢又話隨住引入更多智能維修科技,有助分析列車未來表現趨勢,以及制訂維修政策。

原圖:RTHK