近日香港再次出現新冠肺炎本地感染個案,更有社區爆發嘅跡象。前日(5月31日)一對住喺瀝源邨祿泉樓夫婦確診患上新冠肺炎,尋日(6月1日)女患者嘅兩名同事以及曾經為佢急救嘅醫護人員亦都確診,尋晚瀝源邨祿泉樓亦有4名居民初步確診,合共有7宗病例,屬於近月以嚟較大型嘅爆發。

尋晚衛生署傳染病處主任張竹君、衞生防護中心總監黃加慶醫生同港大微生物學系講座教授袁國勇,去到祿泉樓作環境調查,經專家討論之後,袁國勇同黃加慶表示涉事單位無結構性問題,毋須即時疏散居民,但就要盡快交深喉唾液化驗。

袁國勇解釋,確診者居於唔同樓層,但有3個單位使用同一部升降機,而涉事單位嘅信箱位置非常接近,又用同一大門出入,唔排除係喺公共空間受到感染。

中大呼吸系統科講座教授許樹昌今日接受訪問時亦表示,透過大廈公共設施傳播嘅機會較高,又認為個案剛剛發生,仍需要時間觀察病毒有無擴散,相信限聚令等措施仍未可以放寬。佢強調目前唔可以急於回復正常生活,有部分地方就因為急於「回復正常」而引起更大嘅爆發。

原圖:RTHK