近期香港疫情稍稍緩和,不過當日搶購口罩、消毒液嘅情景,相信唔少香港人依然歷歷在目!有見及此,曾代表香港奪得亞運欖球賽金牌嘅姚錦成,決定同朋友成立殺菌品牌公司SOM,推出一系列抗疫產品,希望幫助運動員安心訓練,亦希望香港人不用再被「撳住嚟搶」! 

本地生產 控制成本

「自從香港出現疫情之後,抗疫產品需求很大,全民排隊爭住買,有些更被人炒貴,見到咁嘅情景真係好心酸!作為運動員,更加明白呢類抗疫產品嘅重要性,疫情期間,比賽同練習都無限期暫停,我就開始思考點做一啲產品去幫助香港運動員,最好就係Made in Hong Kong,咁就可以控制成本,唔使轉嫁落消費者身上。」

早前姚錦成經朋友介紹,認識曼徹斯特大學教授,大家理念相近,就開始商討生產抗疫產品,教授認為銀離子產品適合喺香港製造,因為唔需要太多地方,只要清潔衛生就可以。「我們有四位合資,大家分工合作,教授做研發,一位做生產,一位做Project Manager,而我則做銷售和Marketing。」

及早計劃 不斷地試

原來今次並非姚錦成第一次做銷售工作,作為香港著名欖球員,佢發現香港市面上嘅欖球衫都係外國大牌子,價錢偏貴,所以曾經同另一位隊友設計欖球衫出售。佢咁積極作新嘗試,因為佢一早就明白運動員要為退役後嘅生活作打算:「我自知運動員生涯並唔長久,所以一定要及早計劃,不斷地試。」

打欖球同做銷售,兩樣工作睇嚟完全無關,但姚錦成卻認為兩者有共通點:「打欖球同做銷售,都同樣要有Heart,要有堅持的精神。而且欖球係隊際運動,講求隊友之間嘅合作、溝通,點樣表達自己嘅意見,呢啲同做生意係一樣嘅。」

終極目標 改善港人健康

經過一番努力,佢投資嘅「SOM AG殺菌液」正式面世。產品可以喺1分鐘殺滅9成細菌,姚錦成更強調,產品成份係純天然,因為他本身係運動員,對呢方面特別重視。

雖然投資金額唔細,但姚錦成並無將佢視作一盤生意:「現時生產抗疫產品並非我哋嘅終極目標,呢次亦唔打算賺香港人錢,而係希望幫到香港運動員。未來目標係生產更多產品,從而改善香港人的健康。」


圖:受訪者提供