全球新冠肺炎疫情仍未減退,唔少地方鼓勵員工在家工作。隨住加州政府放寬工作場所限制條件,總部設喺加州嘅Google近日亦推出指引,雖然7月起會重新開放辦公室,但大多數員工仍會繼續在家工作,而且呢個安排可能持續到今年年底。

Google行政總裁Sundar Pichai喺官網發文指,該公司會喺7月6日陸續開放辦公室,但會安排員工有限度輪流上班,大概每兩星期一日,辦公室使用率只會維持10%,目標係9月份能提高到30%。

Pichai亦宣布,由於大部分員工今年內都係在家工作,所以公司將會為員工提供最多1,000美元(約7,780港元)嘅補貼,員工可以用嚟購買在家工作嘅設備同辦公家具,包括站立式辦公枱或符合人體工程學嘅椅子等。咁為員工著想,唔怪得咁多人想加入呢間公司啦!

圖片來源:Google