唔少卡通人物瞓著嗰陣都會打鼻鼾,望落好似瞓得好好咁。如果長期有嚴重鼻鼾聲嘅朋友就要留意喇,因為呢個係睡眠窒息症嘅症狀之一!

打鼻鼾係由於上呼吸道嘅軟組織喺睡眠時放鬆,令呼吸道收窄,呼吸嗰陣就容易產生震動,形成鼻鼾聲。呼吸道阻塞嘅情況越嚴重,鼻鼾聲就會越大。

睡眠窒息症患者會有嚴重鼻鼾,不過經常打鼻鼾亦唔代表有睡眠窒息症。如果有嚴重鼻鼾,外加瞓覺時呼吸間歇性停止、早上頭痛、日間疲倦難以集中精神、反應遲鈍、記憶力衰退、脾氣暴躁、性機能減退等症狀嘅話,建議大家盡快求醫,因為以上呢啲都係睡眠窒息症嘅病徵!

圖:網上圖片