早前因為新冠肺炎疫情關係,關閉一段時間嘅大館最近終於重開喇!大館早前宣布,古蹟及藝術館嘅藝文活動,由尋日(25日)開始陸續回歸,包括2個全新嘅當代美術館展覽,分別係由日本國立國際美術館(大阪)同新加坡美術館聯手呈獻嘅「言語不通」,以及由5位藝術家展出嘅「承受著自身的姿態」 。

「言語不通」由日本國立國際美術館(大阪)同新加坡美術館聯手舉辦,主要展出兩個美術館嘅收藏,以及部分特別委約嘅新作,審視理解、誤解、包容、再現等唔同主題,希望喺陌生嘅領域中尋找共同之處。至於「承受著自身的姿態」展覽,就喺歷史建築F倉內舉行,呢度前身係印刷工場、女子監獄。展覽由譚雪策劃,委約陳沁昕、Thea Djordjadze、Jason Dodge、Eisa Jocson同Pratchaya Phinthong五位藝術家創作全新作品,探討點樣將現存嘅限制同束縛轉化為藝術素材同聯想提示,並糅合詩意同現場體驗。

另外,大館亦帶來糅合舞蹈、戲劇、音樂等元素嘅「動戲‧童迷香港藝術計劃」,以及歷史文物展覽「望左望右:歷史標牌」,展出中區警署建築群曾經用過嘅各式標牌,讓市民體驗大館嘅獨特歷史。

有興趣參觀大館嘅人士記得去以下網址,留意大館嘅最新特別安排:https://www.taikwun.hk/zh/visit/visiting_tai_kwun。

原圖:大館、FB@大館 Tai Kwun