喺新冠肺炎疫情影響下,香港經濟大受打擊,政府上個月推出「保就業、創職位」措施,預留60億元未來2年喺公營及私營機構創造約3萬個有時限職位。環境局早前宣布,喺有關措施下推出「綠色就業計劃」,將於未來幾個月開設超過500個同環保範疇有關嘅職位,提供就業機會之餘,亦可以推動環保,首批超過100個職位會喺今個禮拜喺報章及各「綠在區區」Facebook專頁等,展開招聘。

環境局表示,「綠色就業計劃」涵蓋「EV普及化」、「惜物減廢」及「山海無痕」三個環保工作範疇,開設嘅職位包括全職同兼職,大部分為期約半年至一年。環境保護署(環保署)將於「EV普及化」呢個範疇之下,開設30個項目統籌員(電動車)職位,推動電動車普及化,負責聯絡及協助物業管理公司、業主立案法團及業主委員會等,參加為私人住宅樓宇停車場安裝電動車充電基礎設施嘅先導計劃。

另外「惜物減廢」方面,環保署亦將會開設大約30個項目助理(減廢及回收)職位,協助加強支援各項減廢回收項目工作,以及開設約45個職位,提升「綠在區區」運作。

上述超過100個職位會喺今個禮拜展開招聘,其餘大約400個職位,包括環境署同漁農自然護理署推動「山海無痕」郊遊文化而開設嘅環保大使、生態導賞員等等職位,亦會喺未來幾個月接受申請,有興趣嘅人士就要多啲留意喇。

原圖:香港紫荊雜誌