香港新冠肺炎疫情開始緩和,中三至中五學生聽日終於可以率先復課,港大感染及傳染病中心總監何栢良日前出席電台節目嘅時候,提醒學生復課之後唔好鬆懈,仍然要繼續戴口罩。至於限聚令,何栢良就話成效好微,認為6月4日到期之後可以直接取消,但市民仍然需要全面戴口罩。

何栢良話,全因為市民過去多個月出去都有戴口罩,先至令病毒難以傳播,又話越來越多證據顯示戴口罩可以喺社區造成群體屏障、截斷傳播鏈。佢提到現時見到街上有唔少人戴氣閥口罩,佢形容呢啲口罩係「自私口罩」,方便呼吸但無法阻擋使用者噴出嚟嘅飛沫,為咗保障自己同他人健康,佢呼籲市民唔好使用。

中三至中五學生聽日就復課,何栢良提醒學生如果用重用口罩,需要每日進行清潔,亦要注意手部衛生同埋要有洗手間禮儀,用完座廁之後應該冚上廁板先好沖廁。

對於梨木樹邨家庭群組,何栢良話部分無病徵或病徵輕微嘅患者,呼吸道帶有病毒嘅時間可能長達2至3個月,有機會係社區傳播源頭,如果有家居檢疫嘅人士唔守規矩,亦有機會傳開病毒。

原圖:RTHK