相信有唔少打工仔都試過,因為工作需要而忍尿唔去廁所,早前台灣女主播蕭彤雯,分享佢嘅工作經歷,曾經需要連續多日忍尿,每日只可以去2次廁所,導致患上腎炎、發高燒,甚至引發敗血病,昏迷3日咁耐。有香港腎科專科醫生接受傳媒訪問時解釋,尿入面含有毒素、雜質,長時間留喺體內會影響腎臟。

蕭彤雯喺節目《醫師好辣》上分享,喺2005年英國倫敦發生地鐵連環爆炸恐怖襲擊,佢當時被派到當地採訪。當局因為防止再有炸彈襲擊,就封閉晒所有公廁同快餐店廁所,所以佢喺英國採訪嗰幾日,每日只能夠去2次廁所,朝早起身1次同夜晚返酒店之後1次。

蕭彤雯表示,喺英國期間並無任何不適,但返到台灣之後開始出現腰痛,當時以為自己係扭傷,所以就去咗接受針灸治療,但針灸期間覺得非常痛,於是去急症室求醫,發燒燒到攝氏39.9度。抽血後發現患上腎盂腎炎,並引發敗血症,需要留院接受治療,期間曾昏迷3日,有多次發高燒,不斷發冷、發熱,需要接受抗生素,最終慢慢康復。

蕭彤雯又話當時醫生同佢講,腎炎好易復發,叫佢平時要多飲水、唔好忍尿,有類似症狀要盡快求醫,結果唔夠半年蕭彤雯真係腎炎復發,但佢因為好早就入院接受治療,佢亦好快好返。

香港腎科專科醫生譚國權接受傳媒訪問時解釋,尿入面含有毒素、雜質,忍尿令尿長時間留喺體內會影響腎臟健康,佢又話忍尿亦有機會造成尿道發炎,因為小便嘅其中一個目的就係將細菌排出體外,唔排尿就會令細菌滋生,甚至經尿道爬上膀胱。

原圖:FB@蕭彤雯