早幾年曾經紅極一時嘅貓店長「尖東忌廉哥」,尋日不敵病魔逝世,佢嘅主人高先生喺Facebook專頁「忌廉哥 與 忌廉家族」宣布其死訊,高先生表示「忌廉的離開只是在另一國度去守護著大家」,忌廉家族會延續佢嘅使命,繼續宣揚正能量,「忌廉你永遠都會活在我們心中,讓這份愛可以繼續延續下去,願你一路好走」。

高先生表示,忌廉哥去年9月已經患上胃癌,持續接受治療,去到上週已經病入膏肓,當時獸醫建議為忌廉哥人道毁滅,但高先生同太太都唔捨得,希望陪佢走完最後一段路,延至尋日忌廉哥喺高太太懷中安詳離世。

忌廉哥喺2012年因為一次走失,意外令佢成為網絡紅貓,高先生表示好感謝粉絲多年嚟對忌廉哥嘅鍾愛,高先生希望忌廉哥嘅精神可以遺留人間,令大眾繼續愛惜動物,亦希望忌廉哥嘅基金能夠延續落去,幫助更多動物。

原圖:FB@忌廉哥 與 忌廉家族