去外國升學,可能係唔少人嘅夢想,但就未必個個都負擔得起。出身於基層家庭嘅劉錫華,佢細個嘅時候已經有去外國讀書生活嘅夢想,但佢DSE成績未如理想,入讀一個工商管理學高級文憑課程,期間佢半工讀,並且取得好成績,最終佢達成自己嘅夢想,去到英國留學。最近佢就開設咗一個YouTube頻道,同人分享升學資訊同佢嘅經歷。

劉錫華表示,佢讀高級文憑嘅時候,早上返學、下晝就喺一間小學做教學助理,做咗一年半兼職,再做半年全職,儲到大約20萬元(港元,下同),佢仲話呢段時間都甚少同朋友出去聯誼、食飯,甚至買一罐嘢飲都要思前想後。

劉錫華就話佢揀學校嘅時候,學費都係佢嘅第一考慮,佢只能夠揀學費15萬元嘅大學,佢參考過大學排名同商科資源等因素之後,揀咗位於布里斯托嘅西英格蘭大學(University of the West of England),去年入讀Year 3。佢分享主要使費,佢學費13萬元,扣減1萬元獎學金之後為12萬元,辦理簽證同健康報告等用咗大約7000元,住宿方面佢喺學校附近租咗個套房,共用客廳同廚房,41個禮拜租金大約5萬,另外生活費每月大約2000元。

佢幾經辛苦嚟到英國讀書,佢坦言見到飛機飛過歐洲,感動到流眼淚,佢好珍惜今次機會,從來都唔走堂,佢亦主動識新朋友、坐廉航歐遊。嚟緊佢諗住繼續升學,喺英國讀碩士課程,亦已獲得取錄,但佢就諗住遲一年先入讀,而家都要打工儲錢先。

原圖:FB@UWE Bristol、YouTube@劉華Lauwadee