新冠肺炎疫情嚴重打擊香港經濟,令到唔少人失業,社會地產機構「要有光」創辦人余偉業估計,香港將會出現更多「短貧戶」,佢希望為呢啲短貧戶提供生活空間,幫佢哋跨過難關。

「短貧戶」即係短期貧窮嘅家庭,余偉業解釋近期經濟結構轉型,突然失業,但因為未申請過公屋,唔合資格申請社聯嘅過渡性房屋。「要有光」成立咗10年,余偉業形容佢嘅角色係介乎「無人幫」同社工之間,先向業主徵集住屋單位,翻新做「光房」之後,再租俾短貧戶最多3年。

余偉業就話,「要有光」除咗租屋俾短貧戶住,亦會嘗試督促佢哋轉型,鼓勵佢哋儲蓄。佢介紹「要有光」5大轉型方向同目標,分別係就業轉型、財務轉型、家庭結構轉型、生活轉型同身心轉型。

一、就業轉型。如果租戶無工做,「要有光」就會向佢哋提供建議,探討使唔使轉行,由失業變就業、由炒散變全職,幫助佢哋自給自足。

二、財務轉型。如果租戶想讀書進修,就睇下可以點編排時間,同埋睇下可唔可以將學識轉化成現金或者就業前照。如果租戶係領取緊綜援,亦會提供財務建議,幫佢哋脫貧。

三、家庭結構轉型。如果租戶正值中年,會睇下可唔可以交捧俾子女擔起頭家。如果租戶諗住半工讀,會建議下點樣轉型,兼顧家庭崗位。

四、生活轉型。減少開支,追求有質素生活。例如唔需要俾錢幼兒參加play group,可以選擇多啲陪伴小朋友,旅行亦都唔一定要出埠,可以近近地去南丫島。

五、身心轉型。如果身心俱疲,無法規劃長遠計劃,亦可以讓租戶歇息,用2-3年重建人生目標。

原圖:要有光