香港新冠肺炎疫情開始緩和,市民陸續恢復正常生活,不過政府抗疫專家組成員、港大公共衞生學院院長福田敬二就話,社區感染仍然存在,有需要維持限聚等措施一段時間,佢又話而家全球疫情未穩定,港人未來幾個月都難以外遊,現階段亦唔可能重開邊關,如果唔係就會有機會再爆發疫情。

食物及衞生局局長陳肇始,早前宣布延長限聚令到6月4日,部分高風險處所營業禁令就持續到下週四,陳肇始又話新冠肺炎好大機會唔會喺社區消失。福田敬二認同新冠肺炎唔會消失,佢話社區抗疫措施仍然要維持一段長時間,雖然有風險,但港人想重回正常生活,先放寬限聚人數,再重開處所亦都係合適嘅安排。

福田敬二又話,未來係咪放寬社交距離措施,要視乎疫情進展,但如果再有本地感染個案,就要收緊安排,預料未來幾個月措施都會「時鬆時緊」。

原圖:RTHK