對於鍾意食嘢嘅人嚟講,試食員可以話係一份寓工作於娛樂嘅筍工。最近英國一間食品公司就招聘緊素食餡餅試食員,負責試食新產品,試完之後仲可以免費任食產品一年,都咪話唔過癮!

英國傳媒報道,當地一間食品公司Holland's Pies最近推出第一款純素肉卷,吸引到唔少素食者青睞,於是佢哋希望研發更多唔同款式嘅素食產品,拓展市場。為咗了解素食者口味,佢哋特意聘請試食員,幫手諗下食物款式、味道等等提供意見。

Holland's Pies表示,佢哋正研發緊洋蔥芝士批、純素肉批同蔬菜批等素食產品,試食員會負責品評呢啲即將推出嘅產品。Holland's Pies仲話,試食員毋須工作經驗,只需要每6個月參加1次試食會議,就可以享有會後一年免費任食嘅福利。

原圖:FB@Holland's Pies Official