「行山KOL」發哥尋日65歲生日,唔知今年佢嘅生日願望,會唔會好似早前佢同傳媒咁講,想退休後考牌做行山教練呢?

其實喺香港做行山教練,並唔算太困難,現時集多項教練於一身嘅周佩欣(Wyan)就話,喺香港,好多唔同嘅運動,包括三項鐵人、跑步、健身等等都有教練資格,山藝教練亦唔例外,大家可以報讀山藝證書課程,共分三級,一般嚟講,三個月至半年就可以讀完,之後更可申請成為山藝助教,慢慢累積經驗,再轉做教練。山藝證書入讀要求唔高,香港唔少組織都有提供課程。不過另一項同行山好大關係嘅越野跑,暫時並無機構開辦教練證書課程,Wyan都只可以用同類型運動所學到嘅知識,放喺越野跑入面。

Wyan又指,想做行山教練,不但要性格外向,喜歡同人接觸,仲要有Passion!佢話:「有啲教練只當係一份工,有啲會比較有熱誠,會考慮多啲!」佢指出,每個學員都唔同,所以好嘅教練要因材施教,有時要嚴厲,有時要鼓勵,有時同學員保持亦師亦友嘅關係,有時就要有權威性,而且教練不但要照顧學員嘅體能,甚至心靈上,生活社交都要照顧到,例如學員工作唔開心,狀態唔好,就要諗方法幫佢走出低谷,過程一啲都唔容易,不過佢表示,透過刻苦訓練,見到學員成績有進步,達到佢哋定下嘅目標,真係一件好開心嘅事!

佢仲話,無論行山教練或越野跑教練,近年市場無疑大咗好多,因為多咗人重視健康,亦多咗一啲相關嘅賽事,不過與此同時,教練亦良莠不齊,欠缺監管,出現唔同資歷及背景嘅教練。

圖:FB@周佩欣Wyan Chow