喺新冠肺炎疫情期間,唔少國家都限制出入境、推出隔離檢疫措施,阻止病毒傳入,令全球航空業大受打擊,唔少航空公司更出現裁員潮。喺澳洲,原本喺維珍航空任職空姐嘅Sarah-Rose Sharp最近亦因為疫情而失業,佢就暫時轉行喺礦場工作,佢仲講笑話「一日之內就由高踭鞋換成工人靴」。

根據英國《每日郵報》報道,Sarah-Rose Sharp已經擔任空姐4年咁耐,佢做嘅航線最近就因為疫情而取消,令佢失去工作。喺澳洲,當地嘅礦產業受疫情影響較小,於是就推出1500個為期6個月嘅短期工,希望可以幫手紓困,當中包括請咗45名空姐負責檢測追蹤礦場內工人嘅健康狀況,而Sarah-Rose Sharp就係其中一位獲聘嘅空姐。

Sarah-Rose Sharp就話,而家每日都要同好多人打交道,做空姐期間學到嘅客戶服務技能正好可以派上用場,佢好感激得到呢個工作機會,仲話希望第時可以返去機上工作。

原圖:FB@Sarah-Rose Sharp