嚟到5月,可以話係學期嘅尾聲,唔少即將畢業嘅大學生都會趁早申請各大企業嘅管理培訓生計劃(Management Trainee Programme,簡稱:MT Programme),希望畢業後可以搵份好工。不過有啲公司請人嘅時候聲稱係MT,但入到去實際上就係做打雜。有求職顧問就教大家可以留意以下幾點,分清真假MT。

第一:培訓時間長短。真正嘅MT Programme,係希望吸引有潛質嘅年輕人加入公司,將佢哋培訓成將來嘅管理層。所以MT Programme嘅培訓時間一定會有兩三年,等MT可以接觸同理解公司嘅業務同運作。如果見到培訓期好短,大家就真係要保持警覺喇。

第二:培訓內容有無系統。MT Programme嘅培訓都會有一個嚴密嘅計劃,唔會等到MT入職之後先至即興派job。

第三:人工高。金融機構、銀行、地產發展商、監管機構等等,佢哋MT嘅月薪都最少2萬港元,金融機構或者銀行嘅MT月薪更有機會達3萬以上。如果人工係2萬以下,就需要多加留意。

第四:留意往年MT出路。真正嘅MT Programme都會有明確嘅晉升階段,多數會保證完成後可以升到去特定職級。如果無,仍然停留喺初級職位,就有可能遇到假MT Programme。

第五:招聘程序繁複。MT月薪高,而且培訓時間長,公司招聘嘅時候都會精挑細選,申請人都要「過五關、斬六將」先至成功獲聘。如果見到招聘過程太簡單,就要諗下係咪遇到假MT Programme。

原圖:大公報