唔少女士都有雙下巴嘅問題,有啲係因為本身體型比較肥胖,但有啲明明身型瘦削都有雙下巴咁就好有可能同不良姿勢有關

現代都市人時時機不離身,經常低頭㩒電話,好容易有雙下巴日本有個節目近日請來美容中心「WOVE Clinic」中目黑分部總院長髙瀬聡子分析雙下巴嘅原因,佢話無雙下巴人,側面睇,耳仔同肩膀係成一直線嘅,但好多有雙下巴嘅人,耳仔會比肩膀靠得較前,呢個係由於頭部長期向前傾所致。臉部有30組肌肉同頸椎相連,如果頭部向前傾,相連嘅肌肉亦會跟住向前,導致肌肉鬆弛,形成雙下巴。

髙瀬聡子話,好多低頭族長期用電話、電腦,慢慢養成頭部向前傾習慣。佢最後分享咗簡單兩招趕走雙下巴。

1. 改善行路姿勢,避免寒背

行路嗰陣,頭要微微向上望,保持挺胸,雙手前後擺動,咁樣有助改善寒背之餘,亦避免因寒背導致頭部前傾。

2. 墊毛巾平躺

將毛巾捲成圓筒狀,瞓喺地下或床上嘅時候,喺背部墊一條毛巾,每日躺10分鐘,令胸部挺起,有助矯正頭部前傾問題。

圖:網上圖片