為咗健康著想,無論咩年紀都應該注意飲食。喺台灣,有一位只有20幾歲嘅女仔就因為乳癌病逝,佢家姐就話估計妹妹咁後生就患乳癌係同佢佢生前鍾意食炸雞做宵夜有關。台灣營養師李婉萍就話,乳癌成因有好多種,但呢啲高油脂、高熱量、低纖嘅飲食習慣,的確有機會誘發乳癌,呼籲女士要注意飲食。

李婉萍指出,根據流行病學研究結果顯示,高油脂食物、紅肉及火腿等加工肉品、酒精、牛奶及乳製品嘅攝取量,都同患癌風險成正比。佢解釋,高油脂食物、紅肉及火腿等加工肉品因為含有大量飽和脂肪而且低纖,有增加雌激素濃度或活性嘅趨勢。另外,酒精亦會促進子宮肌瘤生長,而攝取過多牛奶入面嘅飽和性脂肪,亦會造成熱量過剩,增加患上婦科癌症風險。李婉萍建議,婦女可以食多啲新鮮蔬果,有助降低患上子宮頸癌、子宮肌瘤、卵巢癌嘅風險。

喺香港,中大2017年就曾經同加拿大多倫多大學同荷蘭烏德勒支大學聯合發表研究,指出女士喺夜晚10點後進食含高能量碳水化合物,例如飯同麵等等,會提高患上乳癌風險,喺夜晚10點至12點、凌晨2點至4點兩段時間進食,分別會增加風險8成同9成,而凌晨12點至2點就較唔食宵夜嘅人士患癌風險高1.7倍。

原圖:新華社