近年有唔少企業都引入人工智能(AI),應用喺佢哋嘅業務當中,提高工作效能。最近因為疫情關係,唔少企業都改以線上方式舉行招聘面試,有見及此職場社交平台LinkedIn,亦都推出AI面試工具,幫助求職者提升表現,令面試更加順利。

LinkedIn人才解決方案和職業負責人Blake Barnes就話,研發出呢套AI面試工具,分析一般面試嘅標準答案,幫助求職者面試時可以答出更好嘅答案,令面試更順利。LikedIn嘅資料顯示,當求職者錄低求職者答案之後,AI就會自動分析,睇下求職者有咩地方嘅答案需要改善,並會提醒求職者注意返說話速度同埋用字,甚至乎求職者答問題嘅時候,出現「呃」或者「嗯」等語助詞,AI都會提出建議,睇下可以加啲咩內容或者用啲咩方式過場。

Blake Barnes補充,有唔少求職者都話面試嘅時候缺乏信心、緊張,影響面試表現,佢話呢個AI工具就可以幫到求職者練習同改善,提升真正面試時嘅表現。

原圖:LinkedIn