今日5月12日係國際護士節,面對新冠肺炎疫情,好多護士都仍然辛勤工作,喺前線抗疫。北區醫院病房經理(內科)賴永富,佢同太太一樣都係護士,育有2個分別讀緊小一同幼稚園K3嘅兒子,喺疫情初期佢同太太商量由邊個進入Dirty Team工作。因為賴永富曾經做過內科隔離病房,而且太太又善於教兒子功課,所以佢就說服太太由佢進入Dirty Team。

賴永富喺一線同二線隔離病房,合共工作咗6個禮拜,期間一直住喺酒店,唔敢返屋企。佢表示,當初搬入酒店、要同妻兒告別,心情好矛盾,佢坦言自己唔係太擔心安全問題,但就最掛念屋企嘅小朋友同太太,因為當時知道未來幾個月都未必能夠返屋企。

賴永富接受訪問時被問到,兒子對佢去隔離病房工作有咩感受,佢話兒子當時其實係好爽快答應,不過佢知道其實兒子一直期待佢早日回家,一直倒數住佢幾時返屋企。

佢又話佢兒子對爸爸喺前線工作感到好自豪,會周圍同人講,有次佢喺街上撞到英文補習老師,對方都知道佢喺隔離病房工作,好奇點解對方會知,一問之下原來就係出自佢兒子口中。最後賴永富好感謝太太呢段期間負責教導兩名兒子功課。

原圖:大公報