全球多國新冠肺炎疫情持續,合共造成超過28萬人死亡。喺厄瓜多爾,就有近3萬人確診新冠肺炎,超過2000人死亡,當地甚至出現棺材短缺嘅情況,有人以紙板製成棺材,代替木製棺材。喺厄瓜多爾嘅鄰國哥倫比亞,有一間廣告公司就製作咗一個棺材同病床二合為一嘅新產品,希望解決到棺材短缺嘅問題。

廣告公司ABC Display呢個新產品,表面上係一個附有金屬欄杆嘅紙皮床,但當患者病逝後,紙皮床就可以變成一個棺材。ABC Display嘅經理戈麥斯(Rodolfo Gómez)就話,設計理念係源於厄瓜多爾嘅疫情最新情況,希望諗辦法幫助當地嘅貧困家庭。佢又話,每張床嘅價錢大約85美元(約663港元),可以承受150公斤重,佢計劃捐10張俾哥倫比亞亞馬遜省,當地亦正面對資源短缺嘅問題。

不過有醫生就質疑紙板床嘅穩固程度,又提醒遺體放入紙皮棺材之前,需要先放入密封嘅袋內,以免病毒傳播。

原圖:Associated Press