早前曾經大規模爆發新冠肺炎嘅南韓,喺過去一個月疫情改善,每日新增個案數字維持低水平,但最近首爾梨泰院夜店出現感染群組,確診人數最新多達54人,令人憂慮疫情會死灰復燃。南韓總統文在寅日前發表佢就職總統三週年特別演說,警告國民新冠肺炎疫情仲未完結,要繼續保持警惕。

根據韓聯社報道,京畿道龍仁市一名29歲男子上個禮拜三確診新冠肺炎,確診前去過3間位於首爾梨泰院嘅夜店消遣。其後出現多宗同夜店感染群組相關病例,目前累計個案增至54宗,當中43人去過夜店,其餘11人就係夜店確診者嘅親友或密切接觸者。

南韓中央防疫對策本部長鄭銀敬就表示,當局正追查感染源頭及確診者嘅密切接觸人士,佢呼籲民眾喺4月底至5月6日期間去過梨泰院夜店,都應該自我隔離同接受病毒檢測。

原圖:中國新聞網、FB@대한민국 청와대