香港新冠肺炎疫情開始有緩和嘅跡象,但全球嘅疫情仍然持續,唔可以鬆懈。世界衞生組織(WHO)最近研發緊一款應用程式,提供自我評估服務,等民眾可以用呢個應用程式知道自己係咪有新冠肺炎嘅病徵,從而減低對醫療機構嘅壓力,WHO計劃今個月就會推出呢個應用程式。

WHO首席資訊長Bernardo Mariano接受訪問時又話,希望可以幫助一啲資源缺乏、無法自行開發呢類程式嘅國家,追上國際嘅防疫進度。

據報,呢個應用程式推出之後,到時各國政府都可以取得基本技術,自行添加功能,設計屬於自己嘅程式。另外亦有消息指,WHO考慮緊加入病患追蹤功能,但由於涉及私隱問題,WHO正同Google同蘋果公司討論點樣保障私隱等問題。

原圖:新華社