喺新冠肺炎疫情期間,唔少國家都採取封城措施,要求民眾避免外出。喺法國,有位爸爸為咗氹仔女開心,就諗出一個cosplay旅程,扮演唔同職業,例如護士、巴士司機、飛機師、化學老師、話劇老師等等,又同仔女著上唔同地方嘅民族服裝,認識唔同地方嘅文化。

呢位法國爸爸叫Barasou,由當地3月17日開始封城以嚟,佢就一直喺屋企照顧仔女,起初佢只係諗住喺屋企自製一啲遊樂設施,例如平衡木,佢就扮體育老師督促佢哋做運動。後來又扮護士教佢哋一啲衞生常識,扮西班牙舞蹈女郎同佢哋又唱又跳,非常開心。

除咗做運動、教導知識,Barasou亦都著上唔同地方嘅民族服裝,等仔女喺屋企都可以感受到當地方化,例如佢戴上墨西哥帽子扮喺墨西哥渡假,又扮土著體驗喺巴布亞新幾內亞旅遊等等。

佢cosplay嘅時候都影相、拍片放上Facebook專頁,同其他網友分享,唔少網友睇完都大讚有創意,亦為疫情呢段時間帶來一點歡樂。

原圖:FB@Famille Barassou Confinement