因為新冠肺炎疫情關係,日本政府早前宣布延長全國緊急狀態令至今個月底,唔少學校都要繼續停課。喺東京都武藏野市吉祥寺嘅食店「長男堂」,最近就推出平價兒童便當,幫助有需要嘅小朋友,店主仲話如果有經濟困難,可以遲啲先俾,甚至大個咗先俾都無所謂,唔少網民見到都覺得好感動。

事緣上個禮拜三(4月29日),有位日本網友將長男堂門外嘅告示放上Twitter,內容提到「喺學校復課前,本店每逢星期一、四、五嘅上午11時30分至下午6時提供兒童便當,每個售價250日元(約18港元)。唔夠錢或無零用錢嘅小朋友,可以遲啲先再俾,甚至大個之後先返嚟俾都無所謂,如果到時食店已經唔再存在,就用呢啲錢去幫助有需要嘅人。」

唔少網民見到都讚店主有人情味,又話便當雖然平,但有菜有肉營養豐富,有機會都想支持下。亦有網民讚店主嘅愛心,為小朋友上咗一課好好嘅品德教育課。

喺日本,小學生嘅午餐都係經政府補貼、由學校提供,家長要俾嘅費用相當少,但受疫情影響,小朋友毋須返學,變相令基層家庭嘅開支增加。

原圖:Twitter@tugumidu、Twitter@haru_chat