新冠肺炎疫情令全球唔少人嘅生計受影響,而泰國嘅大象亦因為疫情打擊而集體失業。佢哋嘅主人因失去旅遊業帶來嘅收入,無力飼養食量驚人嘅大象,所以最近有超過100隻大象被遣送返鄉下,回歸大自然。

大象係泰國旅遊界嘅代表動物,佢哋之前一直依賴旅遊業嘅收入嚟生活,點知新冠肺炎疫情持續,令本來擁有4頭大象嘅大象公園園主Sadudee Serichevee旅遊業復甦失去希望。Sadudee同妻子已經無法再負擔每月20萬銖(約4.8萬港幣)嘅場地設施租金、象伕薪金同大象飼料開支,於是決定將大象送走。大象們有成20年無返過老家,當佢哋一踏足故土就好開心,唔單止發出愉快嘅叫聲,仲同村入面嘅小朋友一齊玩添。

清邁嘅「拯救大象基金會」(The Save Elephant Foundation)雖然有籌款活動飼養仍然係遊客園區嘅大象,不過基金會就一直主張將大象送返原先嘅棲息地,同附近嘅村民一齊喺大自然生活。基金會創始人Saengduean Chailert表示,接獲大象主人嘅求助,自上月起,清邁已經有大約100隻失業嘅大象被送返原居地,大象們需要攀山涉水咁徒步行返去。

圖:AP