普通蔬菜種植期間都會噴農藥、除害劑,所以蔬菜收成之後都會殘留一啲除害劑。其中菜心因為最容易惹蟲,故此除害劑殘餘都較高,所以浸會大學有機資源中心總監黃煥忠就提醒市民:「菜心不要日日食」。

早前有機構喺全港各區收集咗58個蔬菜樣本測試,發現7成樣本入面驗出含有唔同除害劑殘餘,當中2個本地自稱有機菜心樣本嘅除害劑殘餘含量更超出香港標準。今次被驗出超出香港標準嘅除害劑分別係啶蟲脒(Acetamiprid)同氯氟氰菊酯(Cyhalothrin),啶蟲脒雖屬低毒性,但對人體皮膚有明顯刺激,若誤服啶蟲脒可引起急性中毒,毒素可經皮膚、黏膜、呼吸道、消化道侵入人體然後迅速分佈到全身各個器官,造成唔同程度嘅損害。而氯氟氰菊酯係一種本港受嚴格管制嘅除害劑,佢可通過灰塵或空氣被吸入人體,引起嚴重嘅眼部刺痛,進食氯氟氰菊酯可引致抽搐、咳嗽、喉嚨痛、呼吸困難等。因為菜心同其他蔬菜相比,容易惹蟲,需要比較多農藥,所以黃煥忠就提醒市民唔好日日食菜心。

圖:網上圖片