政府早前宣布今個月底開始分階段復課,有學校都要做好準備工作,確保復課後學生可以安心上課,防止病毒喺校內傳播。早前進行翻新工程、將於8月重開嘅九龍城區宣道會劉平齋紀念國際學校,就因應疫情投放近百萬元購入防疫設備,又制定咗多項措施減少學生聚集、保持校園衞生。

校長許陳幹華日前向傳媒介紹學校一系列嘅防疫措施,包括要求學生喺課室內換上室內鞋履,確保課室清潔衞生,又要求學生將垃圾分類,用過嘅口罩同紙巾須放入指定有蓋嘅垃圾桶內。另外,之後會設有兩節午膳時間,減少午膳期間人流聚集嘅情況,每張檯嘅使用人數由原本5至8人,會減至最多3人,又會派教職員睇住學生用膳嘅情況。

許陳幹華又表示,校方已經用咗幾十萬購入防疫設備,預算新學年將會花費近百萬。購入嘅設備包括3部紫外線燈殺菌充電車,用嚟運送上課用嘅平板電腦等裝置,並且可以喺5分鐘內完成滅菌,另外校方亦會喺每個課室安裝至少2部滅菌噴霧機。校方亦喺有蓋玩樂空間同禮堂附近增設洗手台,方便學生進入室內前洗手。

許陳幹華又話,校方訂購咗5000個本地生產嘅小童口罩,相信會喺6月中到貨。

原圖:FB@Christian Alliance P.C. Lau Memorial International School