新冠肺炎疫情喺美國已經造成超過7萬人死亡,喺紐約有一位91歲老婦帕多(Winifred Pardo)亦因新冠肺炎病逝,但封城令嘅關係,令佢嘅親人無辦法親自到紐約送佢最後一程,好彩最後都有一班有心人,為佢籌備喪禮,而佢嘅家人亦得以透過視像方式觀禮,向佢道別。

帕多住喺紐約布魯克林區,早前就因為新冠肺炎病逝,但佢嘅子女同其他親人都住喺其他唔同州份,封城措施令佢哋無法去到紐約為帕多打理身後事。善終服務組織Fitting Tribute Funeral Services負責人坎寧安(Amy Cunningham)知道呢件事之後,就喺網上發文詢問睇下有無附近居民,願意為帕多送上心意,送佢最後一程。

帖文出咗幾分鐘,就得到唔少居民回應,送出鮮花、布料等喪禮所需物資,又有居民喺布料上「Mom」(媽媽)字樣,貼喺環保棺木上面。葬禮喺呢班互不相識嘅陌生人幫助之下,喺上週三順利舉行,而帕多嘅親人亦得以透過視像方式觀禮,向佢道別,帕多女兒貝絲(Beth Pardo)非常感謝各位有心嘅協助,又話大家將會團結一致度過難關。

原圖:Associated Press