政府尋日宣布會向每一位香港市民派發一個重用口罩,並且喺今日早上開始接受登記,預料成功登記後兩星期就會送到登記人手上。負責呢個項目嘅創新及科技局今日表示,截至中午已經有超過100萬人登記,整體登記過程亦都順暢。

今次政府向所有持有有效香港身份證嘅人士(嬰幼兒除外),每人派發一個名為「銅芯抗疫口罩」嘅重用口罩。市民可以喺5月6日至6月6日喺網上登記,每份登記最多登記6個人(包括1名年滿18歲嘅主要登記人同5名額外登記人),成功登記就一次過經香港郵政將口罩送到去登記地址。網站又提到,就讀小學及幼稚園嘅學童毋須網上登記,之後就會經學校收到中童及幼童口罩。

登記方法非常簡單,進入網站填寫主要登記人嘅姓名、身份證號碼、出生日期、手機號碼同收件地址,要幫其他人登記,就唔需要再填寫地址。如果額外登記人無手機號碼,可以填寫主要登記人嘅手機號碼,由主要登記人代收短訊,但主要登記人就一定要有手機號碼。

網站又提醒,幫人登記之前要先取得對方同意,並要小心保管資料,唔好將個人資料交俾陌生人幫助登記。完成登記後,亦要自行記低登記編號,以便日後查詢進度。

如果錯過咗登記期限,市民日後亦都可以親身去到郵局出示身份證領取口罩,詳細安排同確實日期仍然有待公布。

網站亦有教點樣保養口罩,提醒市民用過嘅口罩必須每日清洗一次,污糟咗或者整濕咗之後亦應該清洗,只需要用普通梘液同凍水單獨手洗,避免幾個口罩一齊洗構成交叉感染。洗嘅時候只需要輕輕攪動同按壓,洗完就用清水沖乾淨、再晾乾就可以,千祈唔好使用漂白劑、衣物柔順劑或含螢光劑洗衣液,洗嘅時候毋須拆出濾芯,洗完亦唔好擰乾、熨燙或用乾衣機烘乾口罩,以免影響功能。

網站又指出,口罩可以清洗60次,之後只需要更換濾芯就可以繼續使用。創新及科技局長薛永恒曾經表示,政府之後會再向市民派發多一個濾芯,如果市民喺登記表格中同意政府將今次資料用於派發其他抗疫用途口罩,政府到時就會按呢啲資料派發濾芯,如果唔同意,到時就要重新登記。

登記網址:https://www.qmask.gov.hk/reginfo/

介紹及示範短片:https://youtu.be/LHd4ppFuutA

原圖:HKRITA