由兩位全國政協副主席董建華、梁振英牽頭成立嘅「香港再出發大聯盟」,今日舉行成立發佈會。大聯盟透過影片發表共同宣言,表示修例風波同新冠肺炎疫情令香港人感到焦慮不安,安全不保、法治受損,係香港幾十年嚟最嚴峻嘅局面,呼籲不同政見、不同階層要拋開區分求共對,早日戰勝疫情和平息亂局。

大聯盟由董建華同梁振英出任總召集人,董建華致辭時表示香港面對非常嚴峻嘅局面,佢指出香港正面對疫情、經濟同政治三大危機,反對派不惜「攬炒」,損害香港共同利益,將香港推向懸崖邊緣。

梁振英致辭時就表示,香港喺多重打擊之下,已經陷入困局,要「病向淺中醫」,近日疫情緩和,係「香港再出發」嘅好時機,佢話大聯盟之後會公布具體工作計劃,振興經濟,為青年人爭取就業、實習同培訓等機會,亦會支持同配合政府做好防疫抗疫工作。會上提到,大聯盟將於今個週末喺各區發派1000萬個口罩。

除咗董建華同梁振英出任總召集人,全國人大常委譚耀宗出任大聯盟嘅秘書長,另外工聯會會長吳秋北、基本法委員會副主任譚惠珠等11人就出任副秘書長。

會上公布合共有1545人嘅共同發起人名單,涵蓋不同界別,包括聖公會大主教鄺保羅、港大張翔同中大段崇智等多間大學校長、長和李嘉誠同恆基李兆基等多位本地地產商,以及劉江華、劉怡翔等多位前局長。

原圖:文匯報