過去週四(30日)同週五(1日)係佛誕同勞動節,有唔少民眾都趁住連續4日假期,同埋近日疫情有所緩和,去到郊外遠足。但有網民喺Facebook群組貼圖發文,指出郊外嘅垃圾堆積如山,批評行山人士自私,唔帶自己帶嚟嘅垃圾,應考慮到清潔工人或者義工,要將呢啲垃圾搬落山係幾咁辛苦。

有網民喺Facebook群組「將軍澳主場」貼圖,標記地點係被譽為「小夏威夷瀑布」嘅將軍澳小夏威夷徑石澗,可以見到有幾大袋垃圾,當中有唔少都係空樽,相信都係行山人士留低嘅。有網民留言表示,呢種情況已經唔係第一次見,批評啲人願意孭住咁重嘅食物同飲品上山,但就唔肯將咁輕嘅垃圾拎返落山。

原圖:FB@將軍澳主場