喺新冠肺炎疫情影響下,日本原定今年7月舉行嘅東京奧運延期,政府又頒發緊急狀態令,令當地經濟大受打擊。上週四(30日),東京練馬區一名早前獲選成為東奧火炬手嘅餐廳老闆若山太郎,懷疑因為餐廳經營受挫,被發現喺店內自焚死亡。

根據日本傳媒報道,週四晚上練馬區一間炸豬扒店突然發生火警,大火救熄之後,當局發現裡面嘅若山太郎嚴重燒傷,送院後不治。警方調查發現,若山太郎身上曾經淋上大量食油,懷疑係因為餐廳經營問題自殺。

當地商店街會長表示,若山太郎本身係一位業餘馬拉松跑手,佢同妻子共同經營呢間炸豬扒店,早前就代表商店街成為東奧火炬手,但受疫情同東奧延期影響,餐廳就喺4月13日起暫停營業。據報,若山太郎生前亦曾經向朋友透露,對餐廳前景感到悲觀。

原圖:tokinome、NHK