唔少人注重養生,鐘意用保溫杯裝飲品,方便隨時隨地飲到暖笠笠嘅嘢飲。不過保溫杯就唔係乜都可以裝,錯誤使用分分鐘得不償失,損害肝、腎功能!

台灣腎臟科醫生洪永祥喺節目《醫師好辣》分享一個病例,有一個男子過去20年嚟每日都用保溫杯裝咖啡飲,就算保溫杯內壁生曬鏽佢都照用,最終因吸收過量金屬導致鉛中毒,更間接引發吸入性肺炎身亡。香港中文大學生命科學院副教授何永成指,保溫杯嘅不銹鋼塗層係由鐵同其他金屬聚合而成,長期用保溫杯儲存酸鹼值過高嘅飲品,例如檸檬汁、茶,就會侵蝕不銹鋼塗層,釋出金屬物質。如果不銹鋼塗層含鉛、鎘等重金屬,呢啲重金屬就有機會積聚喺體內,損害肝、腎功能。

而本港消委會亦提醒,有3類飲品唔可以用保溫杯裝,分別係:酸性強嘅飲品好似西柚汁、橙汁等;有氣嘅碳酸飲品如汽水;酸鹼值過高嘅飲品例如鮮奶、茶等,長期用保溫杯裝呢啲飲品都會侵蝕不銹鋼塗層,引致金屬中毒。而清洗保溫杯嗰陣都要小心保護不鏽鋼塗層,避免用含有氯嘅清潔劑、百潔布、鋼絲刷嚟清潔。

圖:Shutterstock