香港新冠肺炎疫情逐漸緩和,有消息就話教育局局長楊潤雄早前同中小學校長商討復課安排。有家長就喺網上討論區表示,憂慮復課之後,病毒會殘留喺功課同工作紙上,散播病毒。美國有科學家就曾經發表研究,指新冠病毒可以依附喺紙製品表面24小時,所以呢位家長嘅憂慮都係不無道理。

早前就有家長喺網上討論區分享佢對復課嘅憂慮,佢話校服、書包、文具同書本等等都可以清洗或者抹,但功課同工作紙呢啲又點呢?有家長就建議噴消毒酒精,也有網民就話呢位家長太杞人憂天、「無得擔心咁多」,建議小朋友做功課前後洗手,期間亦唔好摸眼耳口鼻同臉。

兒童免疫及傳染病科專科醫生何學工接受傳媒訪問嘅時候解釋,用75%酒精消毒,會令功課上嘅墨水化開,佢都係建議小朋友做功課時要勤洗手,約一小時洗一次,唔好接觸眼口鼻,另外亦要將食物同紙張分開存放,進食後同掂其他物件之後亦要清潔雙手。

對於有家長話戴手套做功課,何學工表示唔認同,佢話小朋友無受過專業教導,喺除手套嘅時候有機會沾染到細菌,無及時消毒會反而增加感染風險。

原圖:文匯報