面對新冠肺炎,全球各地嘅科學家都希望為抗疫出一分力!但大家又知唔知道,原來統計學都可以同抗疫有關。

早前港大醫學院FB專頁,介紹咗港大醫學院公共衞生學院流行病學和生物統計學分部主任高本恩(Benjamin Cowling)教授,佢喺大學時修讀數學同統計學,可能對一般人嚟講,呢類學科好似同醫學扯唔上任何關係,但其實統計學家,好多時都會參與分析公共衞生及傳染病嘅數據。

高本恩喺沙士一役後嚟到香港,加入港大公共衞生學院,主要從事傳染病流行病學嘅研究,包括點樣有效減緩流感傳播,點樣阻止人類受到感染等等。當時政府支持傳染病研究人員做好準備,萬一將來再有疫症爆發,香港都擁有分析疫情嘅能力,並制定最合適嘅防控措施。研究團隊由起初只有幾人,擴展至現時嘅五、六十人。

「我覺得自己是在對的地方、對的時間遇上新型冠狀病毒。」十多年後嘅今日,高本恩咁樣講。新冠肺炎爆發,香港再次成為首批受影響嘅地區,高本恩同港大公共衞生學院研究團隊,享盡「地利」,透過數據掌握本港同內地嘅疫情,加上香港過往累積嘅經驗,令香港可以同世界各地分享資訊,並及早為疫情作出預警。

圖:FB@HKU Medicine