自從新冠肺炎出現之後,大家都明白人同人之間要堅守社交距離,而世界各地,都有唔同方法去保持社交距離,有啲仲好有創意添!

其中杭州一間小學喺星期一開始復課,校方就推廣「頭戴一米帽、保持一米距」嘅守則,要求學生戴住自製嘅「一米帽」上堂,呢頂「一米帽」其實係喺頂帽左右兩邊加上兩塊分別50厘米長嘅紙板,咁就可以同人保持距離啦。學生上堂嘅畫面被上傳到微博之後,網友反應熱烈,好多網民都話好好笑,仲有人話呢頂帽外形十足十宋朝嘅官帽,上堂就變成「百官上朝」。

而喺印度喀拉拉邦(Kerala)一條村,就諗出另一道防疫奇招,村長向村民派發1萬把雨傘,但唔係畀人遮太陽或擋雨,只係希望大家都打開雨傘時,人同人之間自然會有1米距離,咁就可以防止疫情擴散啦。

圖:微博