新冠肺炎疫情喺全球多國蔓延,造成大量確診同死亡,民眾都對社區出現確診個案非常憂慮。喺阿根廷首都布宜諾斯艾利斯,有一名47歲男護士庫夫雷(Silvio Cufré),喺今個月17日因為新冠肺炎逝世,而佢嘅鄰居竟然指責庫夫雷一家將病毒帶到社區,甚至聲言要放火燒屋,令庫夫雷嘅太太奧利娃(Maria Jose Oliva)要報警求助。

當地傳媒報道,庫夫雷今個月6日出現病徵,去到11日確診。奧利娃表示,喺丈夫住院期間,就有鄰居走嚟恐嚇放火燒屋,指責佢哋將病毒帶嚟社區,叫佢哋一家搬走,但佢哋已經喺度住咗差唔多20年,喺丈夫離世之後,就只係得返呢間屋。

當地警方收到奧利娃嘅求助之後,已經加派人手加強巡邏,而當地衞生部門亦發聲明,指奧利娃一家都無病徵,並已經接受隔離,佢哋亦會徹底消毒社區。

原圖:YouTube@Todo Noticias