近期新冠肺炎疫情喺香港有減退跡象,但大家都唔好掉以輕心呀!伊利沙伯醫院感染及傳染病科副顧問醫生朱敏兒就喺FB專頁「伊院通 - Q E H 員工資訊台」入面,回憶新冠肺炎最初傳入香港,大家如臨大敵嘅情景,至今仍然印象難忘。

伊利沙伯醫院喺1月22日出現全港首宗新冠病毒感染嘅高度懷疑個案,朱醫生當時嘅反應係覺得傳染病同人類呢場大戰「真係打到嚟」,之後確診個案一直攀升,朱醫生亦一直專注照顧新型肺炎病人,完全無喘息嘅空間。特別係三月尾,當留學生同外遊人士回港,多個本地感染群組爆發,伊利沙伯醫院嘅隔離病房,面對非常嚴峻嘅考驗。

「那幾天有很多病人蜂擁入院,除了確診個案之外,還有大量懷疑個案或確診個案的密切接觸者需要排除感染,我們必須再加開病房應對這種情況,另一方面也有一些同事輪替加入,在人手上、溝通上、磨合上,四方八面的挑戰同時出現。」本來朱醫生預期喺四月暫別抗疫前線,但由於形勢緊急,佢決定堅守團隊,同傳染病奮戰到底。

近幾個月,朱醫生每日都打緊仗,記憶都變得模糊,但她仍然記得年初二嘅開年飯:「我跟父母說,之後可能一段時間不能回來探望,當時父母並不知道我加入隔離病房團隊,我不想他們擔心……」說到家人,朱醫生雙眼都紅晒,但朱醫生無悔以傳染病為專科:「太平的日子不是必然,傳染病科之所以重要,是因為大多數傳染病,都可以根治及消滅,我們終會打勝這場疫戰。」

圖:FB@伊院通-QEH員工資訊台