新冠肺炎全球疫情持續,美國嘅確診個案高達80幾萬宗,當地醫護人員可以話係相當忙碌。當地有一位喺急症室工作嘅醫生,因為需要照顧新冠肺炎患者,憂慮自己會受到感染,所以選擇展開自我隔離嘅生活。但佢又唔捨得妻兒,於是就諗到住喺屋企後院嘅樹屋,咁就可以一邊離遠望住家人,一邊自我隔離啦!

現年39歲、喺美國德薩斯州一間醫院急症室工作嘅醫生Jason Barnes,過去幾個月都喺前線抗疫,佢同太太育有2名分別6歲同9歲嘅兒子。佢同其他同事一樣,因為希望保護家人,工作之後都唔敢返屋企,但佢就諗到屋企咁啱有間樹屋,可以用嚟自我隔離。

佢表示,呢間樹屋原本係整俾兩個仔玩,而家就俾佢用嚟隔離,佢兩個仔都好理解。佢仲話樹屋設備齊全,有冷氣、床舖同簡陋嘅臨時廁所,仲連接到屋企嘅wifi,可以用手機同電腦上網。佢話平時有生活用品需要,就會向家人大叫,亦會離遠望下佢哋。

原圖:Caller-Times