新冠肺炎疫情喺全國多國持續,各地嘅醫護人員都非常忙碌、面對好大嘅壓力。喺英國,去年贏得「英格蘭小姐」冠軍、24歲嘅穆克吉(Bhasha Mukherjee),選美之前其實係一位醫生,見到當地因為新冠肺疫情關係,醫護人手變得緊張,佢就毅然決定重返醫院,協助抗疫。但重返醫院之後,佢發現醫院嘅情況同佢想像中好唔同,對現時前線醫護缺乏足夠嘅防護裝備,感到非常沮喪同憤怒,佢又寫日記,記錄自己喺醫院嘅所見所聞。

穆克吉表示,佢第一日返工被安排到急性冠心症病房工作,佢同一位醫生午膳嘅時候,就得悉對方曾經確診新冠肺炎,完成自我隔離之後就重投工作。之後佢發覺,喺確診患者病房工作嘅護士,防護裝備只有一個普通外科口罩、手套同圍裙,除非患者需要吸氧氣,如果唔係都唔會獲發N95口罩,穆克吉形容情況「好可悲」。

穆克吉又引述醫護嘅講法,若非喺深切治療部工作,都唔會獲發防護衣,而對於一啲懷疑個案,醫護人員都只能夠戴普通外科口罩。雖然穆克吉對醫護人員嘅工作感到憂慮,但佢就話非常鍾意而家嘅工作,仲話「總有一天,我會再戴上英格蘭小姐嘅后冠,但目前我只會著醫生袍」。

原圖:IG@drbhashamukherjee