中學文憑試(DSE)今個禮拜五(24日)就開考喇,唔知各位考生準備好未呢?今個禮拜五率先開考嘅係視覺藝術科,4個核心科目中文、英文、數學同通識亦將於下週一起陸續開考。

香港中文大學醫院最近就喺Facebook專頁,分享咗個「DSE防疫checklist」,提醒考生有咩要準備之餘,又為考生打打氣!有關checklist如下:

一、兩個口罩以作替換,視乎口罩狀況,如口罩被汗或者其他液體整濕,就需要更換;

二、一個信封,喺小休進食嘅時候,用嚟放置用過嘅口罩,方便之後重用;

三、一支細嘅酒精搓手液,喺考場內用嚟清潔雙手,不過都要記住盡量唔好摸眼、鼻、口;

四、樽裝水,根據考評局指引,學校會停止開放校内嘅飲水機等設施,所以就要自己帶定,以備不時之需喇;

五、建議每日著一套乾淨嘅衣服,而每日返屋企之後都要拎去洗。

另外,中大醫院公共衞生醫學專科醫生蔡曉陽又提醒考生,因為身體體溫會隨住活動變化,如果天氣好熱或者好趕咁跑去試場,都會令體溫輕微升高,佢呼籲考生預多少少時間,唔好太趕,或者坐陣唞下,先至去探熱。

原圖:大公報、FB@CUHK Medical Centre