新冠肺炎肆虐,大家最希望嘅就係早啲研製出疫苗或特效藥結束呢場疫症。喺研製出嚟之前,內地曾試過用新冠康復者嘅血漿嚟治療重症患者,最近港大醫學院團隊亦都有意使用呢種「血漿療法」治療新冠肺炎,並同紅十字會合作,篩選合適嘅康復者捐血漿,預料最快一周內可使用康復者血漿。

隨著香港本地嘅新冠患者康復出院,香港大學發現,喺100名康復者入面,約一半康復者嘅抗體水平,達到可捐血漿作治療嘅1160水平,即係將血漿稀釋160倍後仍能抑制病毒。港大醫學院內科學系傳染病科主任孔繁毅表示,初步發現病徵愈嚴重嘅患者,抗體水平愈高,無症狀者嘅抗體水平往往較低。佢指出,團隊正同紅十字會輸血服務中心合作,篩選適合嘅康復者捐血漿,料最快一周內應用「恢復血漿」治療較嚴重患者。孔繁毅亦鼓勵康復者,尤其係55歲以下、健康狀况良好嘅男性康復者考慮捐血漿救其他病人。

圖:HKU Med