新冠肺炎奪去唔少人嘅生命,更令全球經濟幾乎停頓,造成嘅後果無人想見到。不過,由於疫情關係,人類活動減少,亦間接令地球有咗喘息空間,例如印度近期就出現多個難得一見嘅奇景包括恒河水質大幅改善、28萬隻海龜上岸產卵、印度西北部30年來首次望到喜馬拉雅山脈等。

印度恒河一直以來受沿岸工業廢水污染,係世界上污染最嚴重嘅河流之一,絕對唔適合「直接飲用」。但據《印度時報》報道,因受新冠肺炎疫情影響,印度實施全國封鎖,工廠停工,令恒河水質大幅改善,部分河段甚至清澈見底。報道中引述環境科學家喬希(BD Joshi)指,部分區域嘅恒河水,已經達到可直接飲用嘅標準。

除此以外,印度嘅魯西庫利亞(Rushikuly)沙灘,喺3月中下旬,喺短短1星期入面就湧入近28萬隻欖蠵龜產卵,一隻隻母龜排列喺海灘上,綿延6公里,上一次有咁壯觀嘅情景已經係7年前嘅事。當地因為經常有大量人潮,導致欖蠵龜喺2002、2007、2016、2019年都無上岸築巢。估唔到今年受新冠肺炎影響,令呢個欖蠵龜排排產卵嘅景象再次出現。另外仲有喺印度西北部,30年來首次可以用肉眼就望到喜馬拉雅山脈。或者疫情過後,大家都要反思,點樣喺維持人類正常生活嘅同時,減少對環境嘅破壞。

圖:YouTube@Indiatimes,Twitter@gull_1985,IG@bipro_seas