喺新冠肺炎疫情期間,唔少國家都實施封關及限制市民外出措施,導致唔少收入依賴遊客嘅行業大受打擊。喺德國,就有一間動物園,因為新冠肺炎疫情而導致經營困難,最壞情況甚至考慮殺死部分動物用嚟餵其他同伴。

英國廣播公司(BBC)報道,位於德國北部嘅新明斯特動物園,一共養咗700幾隻動物,但新冠肺炎疫情關係,估計今年春季損失大約17.5萬歐元(約148萬港元)收入。負責人Verena Kaspari話,喺迫不得已之下,或者要為部分動物安樂死,佢哋已經列出優先死亡名單。佢解釋,動物食物量好大,例如海豹同企鵝每日都要食大量鮮魚,都令動物園難以負擔。

佢仲話,要犧牲部分動物嚟令其他同伴生存,係迫於無奈同令人難過嘅做法,但與其要餓死,倒不如等佢哋可以安樂死。

原圖:FB@Tierpark Neumünster e.V.​