英國新冠肺炎疫情持續,一位喺香港出世、移民英國40幾年嘅女護士Alice Kit Tak Ong,喺工作期間感染新冠肺炎,日前病逝,終年70歲。佢嘅女兒Melissa Ong表示,媽媽奉獻一生照顧病人,受到其他人愛戴,認為佢可能係因為喺無防護裝備下工作而受到感染。

英國傳媒報道,Alice喺香港出世,23歲嘅時候移民到英國,並修讀護理課程,其後一直喺英國國民保健服務處(NHS)工作,合共超過44年,期間做過助產士同糖尿病專科護士,年屆70歲仍然唔退休,繼續做全職護士,經常喺兩間診所之間奔波。直至較早前,確診感染新冠肺炎,起初佢喺屋企自我隔離,但之後出現呼吸困難,入院治理兩個禮拜後,延至週二(7日)不治。

原圖:Twitter@@NursingNotesUK、新華社